Ka taksa hi i tana hlan ral vek tur ni ta se, ka hlàn vek duh tak tak ang! Mahse ka duh avanga hlan theih a ni lo va, ka peih avanga tuar thei ka ni si lo!

Hmangaihna zawng zawng la khâwm ila, mihausa leh thiltithei, hmel tha leh pian nalh, thiamna leh finna zawng zawnga thuam te hmangaihna pawh tel vekin, ka hmangaihna che nën hian tehkhinin khaikhin ila, bûkin teh vek mah ila, ka hmangaihna che hi ama tâwkah hian a chhuanawm phâk ve ngei ang tih ka ring. Tu hmangaihna mah hian nang ka hmangaihna che hi a khûm ka ring lova, tu tan maha khûm rual a ni lovang.

Ni, chutiang chu ni mahse, kan inkarah mel tam tak a awm ang bawkin, ka taksa ngei hmanga kuah che a, thlamuan che a, hlimpui tur che hian hringnun kal pangngai hian remchanna a siam si lo va. Harsatna ruam dungchhir leh hrehawmna tlang chhip lawn chhuah tur pawh lawn chhuah huam êm êm chunga hmangaihtu che hian hetiang thu bâk a hraw leh awmze nei hi sawi tur ka nei ve ta lo a ni. 

Ka theihtâwk hi a va tlem em! Ka hmangaihna che hi chu a tlemin a neu bik lo a sin maw le!

Mahse, heng thu tal hi ka la sawi thei alawm -

I hun lo kal leh zel turah vàn angelte chuan vengin hualhim zêl che se la, harsatnain hlahthlem thin che se. Lo hmuingilin, Pathianin eizawnna tha tak pe chein, i no chu englai mahin ruak suh se.

Hlimna hi mihringin a dam chhunga a zawn, duhtâwk leh chin lêm nei lova kan zawn thin a ni. Chu hlimna chu i ta ni se, i nuih nasat luat avangin i mittui luang hial thin se la. Thian fel tak tak neiin, chûngte chu i tan rangkachak leh lunghlu aiin lo hlu zawk sela. Thinrimnain i hmel tidur ngai lo se, hlimnain i hmel chu ti-êng reng zawk rawh se.

A chang chuan hringnun hi a nih ang anga pawm a ngai ve bawk tih hi i hriat loh ka duh lo. Ni, he khawvêlin a pêk theih zingah hian a tha ber, a mawi ber, a thlum ber, a duhawm ber leh a hlimawm ber duhsak che mah ila, chutiang zawng zawng, englai pawha neih reng chu thil theih a ni lova, hringnun kalphung a ni lo. 

Harsatnain a nuai hun che a thleng ang a, thlasik khaw vâwt ang maiin hun khirhkhan i tawh hun a la awm ngei ang. Chutih hunah chuan hlauhna leh timnain i rilru a luah ang a, i la khur hial maithei. Ni e, engpawh ni se, he khawvela mihringin a tawn tur ang chu mihring kan nih miau avangin eng vang tehlulin nge keini pahnih hian, keini kan nih avanga kan pumpelh kher kher bik ang? Tiraw?

Chutiang hun a lo thlen a, harsatna leh buainain a nan tikah che hei hi i hre dawn nia - ka hmangaihna chuan englai pawhin a zui zêl che a, i bulah a awm reng a, i ke hniak tin a rap ve zêl - tih hi.

I lungphu tinah khan ka hmangaihna chuan thu sawi reng sela, hriat loh lamtluang i zawh lai te, nuam ti taka hringnun i hman lai pawhin ka hmangaihna che hi a chuai ve lova, hmangaih tàwp lovin ka hmangaih reng che tih hi i hre reng dawn nia.

Bawihte, nangmah chauhva i awm lai pawhin, malin i awm lo tih hi hre reng rawh aw - ka hmangaih êm êm si che a.

(Ref. 'Never Alone' By Lady Antebellum)

'Hmangaihna hian ramri a nei lo,' an lo ti thin. Ni, Pathian thuin 'bat' a phal awmchhun hmangaihna hian vun rawng a thliar lova, hnam leh chi a thliar lova, dinhmun leh nihna a ngaipawimawh ber lo fo. 

Chutiang a nih avang chuan he khawvel ram zauvah hian, kan Pathianin kan chenna turin ramri te min khamsak mahse, he hmangaihna avang hian chu sadai chu kan thiat thin.

Chi leh hnam dang inkara hmangaihna piang chhuak hi chu a nawlpui hian pawm harsa kan ti tawh lem lo a ni maithei a. Chutih lai chuan mi thenkhat chuan an huam zau leh hret a, mahni neih ang nei hmangaih ta tlat pawh kan awm leh ta zel a, hmangaihna hahthlâk leh buaithlâk tak a va ni em!

Hmangaihna chauh changchawia nupui pasal inneihna hian rah thlamuanawm a chhuah loh chang a tam ve khawp mai. Hnam hrang inneih avanga harsatna hi khawvel hnam tin zingah a thleng ve reng a. Mizo leh zo lo chu hmangaihna kawngah inthurual mahse, hmangaihna huang piah lama kan nunhonaah harsatna awm chang a awm leh thin.

Mi tam tak chuan hmangaihna hi an la na lutuk fo va. Hmel leh nungchang te, nihna leh rosum avang tea inhmangaihna hi an mausam a. Hmangaihna chu vawikhat inhmuhnaa piang nghal ngei ni kher turin an beisei bawk a. A chang chuan tu emaw kan hmangaihna te hi kan ringhlel leh thin.

Lalhmingliana Saiawi chuan, "A chhan chu eng vang pawh ni se, kan inhmangaihna chuan dam chhung a daih chuan a tawk mai," a lo ti tawh a, hmangaihna chi hrang hrang sawifiah leh sawi thiam tumna zinga pawmawm ber a ni hial ang.

Khawvelin India ram a ngaihnêp theih lohna chhan lian ber chu mihring kan tam hi a ni tih mithiamten an sawi thin. Sumdawn nana khawvel company lianten India ram an it tlat mai hi thildang vak a ni lo - mihring kan tam vang a ni ber mai. Chutih lai chuan Mizote hi India ram mihring zingah, a hnam anga tlem ber pawl kan ni.

A chunga thu hlawm khian hmangaihna kawng a zawh lo hle na a, a inzawm ve tlat lawi a! A chhan chu keini ang, hnam tlem leh hmasawn mek tan hian hnam dang hmangaih hian hmasawnna lam kawng a hawi lo ve thei tlat.

Kan hmangaihna leh mi kan va hmangaih chhan chu eng pawh ni rawh se - a theih hram chuan, a hmei a pain, Mizo ngei hmangaih hi a him ber tih hian thu lai a la tâwk hle ngei ang.

Mizo nula chuan a hmeichhiatpui hmangaih lovin, mipa ngei hmangaih se, a theih hram chuan Mizo tlangval ngei hmangaih se a duhawm ber.

Chutiang bawkin Mizo mipa pawhin Mizo nula ngei hmangaih se, hmangaih tlâk leh Mizo hmeichhiate rinchhan tlâk mipa nih tum bawk se a tha ngawt ang.

Hnam damna atana thil pawimawh hi a tam hle ang a, sawi mai sen a ni lovang. Chutiang zingah chuan inthlahpun a, hnam anga dinchhuah hi a pawimawh zinga tel ve tlat a nih ngai chuan, hmangaihna pawh hi hnam dam leh dam loh hriltu a ni ve ngei ang.

Mizo i ni em? Tunge i hmangaih a, eng ang mi nge i hmangaih?

Lu meh dan hrim hrim pawh hi a dang ta e! Tlangval lu buk lutuk te kha vantlang aia boruak hap sang deuh, an inkhawm ve chang pawha hnung lam tlara thu tura mi ngaih deuh thup an ni thin. Nulate pawh sam ngil siau, dar vaw hnâp mai kha ‘a mawi ber mai’ kan ti thin em ni kha? Chutiang chu kan tunlai khawvel hi a ni tawh lo tih hi sawi thiam a har zawk. Chutiang sawi takah chuan, Chawlhni chawhnu inkhawmah,tlar hnung lam atangin hmeichhe thutna lam i thlir ve tawh em? I la thlir lo a nih chuan, en teh, ka sawi hi lo ngaithla teh - nula sam aiin nuho sam zuk nalh zawk daih a! I awih loh chuan han thlir ve la, i hre mai ang. 

Mobile Phone awm tan tirh lam kha chuan, khawlaiah, kal paha mi biak te kha a zahthlak deuh roh thin. Tunah chuan Vai lala pawhin kal pahin a duh duh a bia a, tumahin barah kan khawn tawh hlei nem!

Hmanah chuan innei thar deuh pawh khawlaiah kut inkaiin an kal ngam mang lo. Nulate phei kha chuan an chawn aia sang hi khawtlang an hmuhtir ngai lo hrim hrim. Vawiin kan khawlai hi thlir la, tleirawl tê tê pawh kut insuih rial rialin an kal ngam tawh a, an hmuhnawm zék lehnghal! Kan nulate pawhin hisap zui  tur awm mang lo khawpin min hmuhtir zo ta deuh vek mai!

Khawvel kalphung ngaihtuah zui tur leh hisap zui tur hi a zuah tlem ta tial tial hrim hrim mai. Tun hma kha chuan Israel ram thu thar te kha Pu C. Rokhuma’n a ziah hma chuan a ngai kha kan ring char char mai a. Himalaya tlang khawimaw laia kephah lian hniak an hmuhte kha a hnu kum thum velah kan han thu thar chhiar ve ta thin kha a nia! Tunlaia thu thar kan tih te hi chu a thar thei a nia. Mumbai-a hel hovin Taj Hotel an tihbuai lai te, England-a khaw tam taka thalai rual awmngaihna hre lovin an duh duh an phingchil te pawh khan, a hnu hretah kan hmu a ni mai lo - chutiang thil a thlen lai la la chuan kan hmu thei nghal tawh a nia! changkang tawh vet vet tak kan ni!

A changtu pakhat chauh lanna film, mobile phone hmanga siam te pawh itunah chuan ‘ngaiah’  kan neih ta deuh dêr a! Britney-i leh Kim Kardashian-i te pindan chhungril nunchan pawh awlsam takin kan hmet chhuak thei mai tawh a, khuhhawnna hran hi a ngai tawh lo reng reng.

Kan duh emaw duh lo emaw, khawvel changkanna hian min nuai chho mawlh mawlh zel a. Kan inrin hun nghâk lovin changkanna hrang hrang hi barh luih kan ni a, tlanchhiat pawh tum ila tlanchhiatna tur a awm tawh lo. Thliarkar rilru hmanga lo indan mai chi lah a ni hek lo; engtia tih chi nge maw ni dawn le!?

Hmanah kha chuan naupang exam laia hmuhnawm chhuah kan khap mai thin kha a ni a, tunah erawh chutiang tih tum chu Sanghawngsei hriau benga luhtir tum nen a inang reng tawh. Chutiang nun leh huna kan chen tawh hnu pawha Kohhran leh YMA ten kalphung ngaia inhruai kan tum reng a nih chuan a harsat dan tur hi sawi ngai lova chiang a ni.

A lova kan awm theih loh chemtê ken khap ai chuan a ken dan inzirtir mai hi a finthlâk thin a. Hmasawnna leh changkanna ken tel tha lo tam tak avanga inkhap thianghlim tum ai chuan a tha leh tha lo thliar thiam tura infuih leh inzirtir hi a finthlâk zawk lo maw? tih hi mi tam tak ngaihdan a ni mai lo - khawvel ngaihdan a ni tawh.